नेपालगञ्ज । नेपालगञ्ज उपमहानगरपालिकालाई साक्षर नगरपालिका घोषणा गरिएको छ । आज आयोजित औपचारिक कार्यक्रममा जिल्ला समन्वय समिति बाँकेका संयोजक अजय कुमार श्रीवास्तव र नगर प्रमुख डा. धवल शम्शेर राणाले नगरलाई साक्षर घोषणा गरे । नगर प्रमुख राणाले लामो समयको प्रयासपछि नगरलाई साक्षर घोषणा गरिएको भन्दै साथ दिने सबैप्रति आभार प्रकट गरे ।
जिसस संयोजक श्रीवास्तवले ५ वर्षको पर्यत्न अन्तिम समयमा सफल भएको भन्दै नेपालगञ्ज साक्षर घोषणा हुने सातौं स्थानीय तह भएको बताए । नेपालगञ्ज साक्षर भएपछि जिल्लाभरमै उत्साह छाएको उनको भनाई छ ।
नेपालगञ्ज उपमहानगरपालिकाका उपसचिव गोर्खबहादुर थापाले २०७६ देखि सुरु भएको साक्षरता अभियान अहिले सफल भएको बताए । उनले दुई वर्षअघि घरदैलो मार्फत् संकलन गरिएको तथ्यांक अनुसार १५ देखि ६० वर्ष उमेर समूहका करिब २३ प्रतिशत निरक्षर रहेकोमा साक्षर अभियानपछि निरक्षरहरुको संख्या ५ प्रतिशत भन्दा कममा झरेको जानकारी दिए ।
कार्यक्रममा शिक्षा समन्वय इकाईका प्रमुख रामसुरेश यादव, नेपालगञ्ज उपमहानगरपालिकाका प्रमुख प्रशासकीय अधिकृत जगत बस्नेत, वडा नम्बर १२ का वडा अध्यक्ष बुद्धीसागर सुवेदी, नगर शिक्षक महासंघका अध्यक्ष मनोजराजा श्रीवास्तव लगायतले शुभकामना ब्यक्त गरेका थिए ।
