बाँके । स्थानीय तह निर्वाचनमा ६४ प्रतिशत मतदान भएको निर्वाचन आयोगले जानकारी दिएको छ । तर, आयोगले अपेक्षा गरेकोभन्दा यो कम मतदान हो ।
स्थानीय तह निर्वाचनमा मतदानका लागि तोकिएको समय सकिएपछि पत्रकार सम्मेलन गर्दै निर्वाचन आयोगले ६४ प्रतिशत मात्र मतदान भएको जानकारी दिएको हो ।
निर्वाचन आयोग आफैले पनि ६४ प्रतिशत मात्र मत खसेको भन्दै चिन्ता व्यक्त गरेको छ । पत्रकार सम्मेलनमा बोल्दै निर्वाचन आयोगका प्रमुख आयुक्त दिनेशकुमार थपलियाले भने– ‘प्रारम्भिक जानकारीअनुसार ६४ प्रतिशत मात्र मतदान भएको छ । यो हामीले अपेक्षा गरेकोभन्दा कम संख्याको मतदान हो । यस विषयमा हामी चिन्तित छौं ।’
निर्वाचन आयोगले स्थानीय तह निर्वाचनमा ७२ प्रतिशतसम्म मतदान हुने प्रक्षेपण गरेको थियो । तर, सोअनुसार मतदान नभएको हो ।
ठूलो जनघनत्व भएको स्थानीय तहहरुमै अपेक्षाकृत मतदान नभएका कारण ६४ प्रतिशत मात्र मतदान भएको आयोगको ठहर रहेको छ ।
प्रमुख आयुक्त थपलियाले भने– ‘हामीले काठमाडौं जस्तो ठूलो जनघनत्व भएको स्थानीय तहमा धेरै मतदान हुने अपेक्षा गरेका थियौं । तर, काठमाडौंमा पनि अपेक्षाकृत मतदान भएन । त्यसैले आयोगले सोचे जति मतदान नभएको हो ।’
