सुनिता श्रेष्ठ
बाँके । स्थानीय तहको निर्वाचनका लागि उम्मेदवारी दिएका दलहरू जनतासँग मत माग्दै घरदैलोमा जुटेका छन् । 
विभिन्न दलहरूको चुनावी अभियानले नेपालगञ्जमा निर्वाचनको रौनक छाएको छ । कमल थापा नेतृत्वको राप्रपा नेपाल आफ्नो चुनावी एजेण्डा सहित रंगीचंगी झण्डा बोकेर टोलटोलमा पुग्ने गरेको छ । चुनावी गीत बजाएर कार्यकर्ताका साथमा नाच्दै टोलटोलमा गएर उम्मेदवारले जनतासँग मत मागेका छन् ।
नेपालगञ्ज उपमहानगरपालिकाका मेयर पदका उम्मेदवार अभय बस्नेत पनि घरदैलोमा व्यस्त छन् । आफु निर्वाचित भए जनताको घर-घरमा नै सेवा सुबिधा पुर्याउने प्रतिबद्धतासहित उहाँले मतदातासँग भेटघाट जारी राख्नु भएको छ । आज नेपालगञ्ज ६ फुल्टेक्रामा निर्वाचन प्रचार प्रसार कार्यालयको उद्घाटन गर्दै घरदैलो तथा मतदातासँगको भेटघाटमा उहाँले आफूले जितेमा सबै वडामा समान ढंगले विकासको खाका कोर्ने बताए ।
यस्तै नेपालगञ्ज ६ मा राप्रपा नेपालबाट वडा अध्यक्षमा मदन राज शर्मा, वडा सदस्यहरु दिपक श्रेष्ठ, साबित्री देवी शर्मा अधिकारी, हितेश भारती र मिरा खटिकले उम्मेदवारी दिएका छन् । वडा सदस्यका उम्मेदवार दिपक श्रेष्ठ र साबित्री शर्मा राप्रपाबाट गत चुनावमा वडा सदस्यमा निर्वाचित हुनुभएको थियो । 
निर्वाचित भएर जनताको मन जित्न सफल श्रेष्ठ र शर्मा सहित उनको पुरै प्यानलको जित निश्चित रहेको स्थानीयले बताए । उम्मेदवार श्रेष्ठले राप्रपाको शाख जोगाउने हामी वडा सदस्यहरुले नै राप्रपालाई वडामा क्लिन गरि राप्रपा नेपाललाई स्थापित गर्ने जिकिर गर्नुभयो ।
आर्थिक राजधानी निर्माणका लागि उद्योग, व्यापारलाई अनुकूल वातावरण बनाउने, शिक्षा, स्वास्थ्य र पर्यटनका अपार सम्भावनालाई उजागर गर्ने, त्यसअनुरूपका पूर्वाधार बनाउने योजना राप्रपा नेपाल संग रहेको जिल्ला अध्यक्ष दिपेन्द्र सिंहले बताउनुभयो । राप्रपा नेपालको सुरु भएको घरदैलो अभियानमा महामन्त्री, सहमहामन्त्री, केन्द्रीय सदस्यहरु जिल्लाका नेताहरुको सहभागिता रहेको थियो ।
