काठमाडौं । स्थानीय निर्वाचनको मतपरिणाम आइनसक्दै प्रदेश र प्रतिनिधिसभाको निर्वाचनबारे छलफल सुरु भएको छ। आगामी मंसिरमा संसदीय निर्वाचन भएको ५ वर्ष पूरा हुँदै छ ।
मंसिरमा संसदीय निर्वाचन हुने अधिकांशको आँकलन भए पनि सरकार भने फागुनमा आम निर्वाचन गर्ने तयारीमा देखिएको छ। गठबन्धन दलहरूबिच नै संसदीय निर्वाचन संसद्को पूरा कार्यकाल सकिएपछि गर्ने सहमति भएको गठबन्धनका एक शीर्ष नेताको दाबी छ । ती नेताका अनुसार २०७४ फागुनमा प्रतिनिधिसभाको कार्यकाल सुरु भएकाले फागुनमै संसदीय निर्वाचन हुने सम्भावना प्रबल छ ।
‘संसदीय निर्वाचन फागुनमा हुन्छ, हो । सर्वोच्चको आदेशले पनि संसद्लाई पूरा कार्यकाल चल्न दिनुपर्छ भनेको छ’ ती नेताले भने ।
संविधानको धारा ८५ को १ मा ‘यस संविधान बमोजिम अगावै विघटन भएकोमा बाहेक प्रतिनिधिसभाको कार्यकाल पाँच वर्षको हुने’ उल्लेख छ ।
वर्तमान प्रतिनिधिसभाले २०७४ साल फागुनदेखि काम सुरु गरेको थियो । त्यस्तै प्रतिनिधिसभा विघटनविरुद्ध सर्वोच्च अदालतले गरेको फैसलामा पनि ‘संविधानको धारा ७६ (५) बमोजिम बनेको प्रधानमन्त्रीले विश्वासको मत लिन नसकेमा मात्रै संसद् विघटन गरी निर्वाचन घोषणा गर्न सक्ने’ आशय रहेको देखिन्छ ।
