बाँके । नेपाली कम्युनिष्ट पार्टी बाँके क्षेत्र नम्बर २ का साझा उम्मेदवार दिपेन्द्र विष्टको उपस्थितिमा नेपालगञ्ज उपमहानगरपालिका वडा नम्बर १९ मा निर्वाचन सम्पर्क कार्यालय भव्य रूपमा उद्घाटन गरिएको छ ।
उद्घाटन समारोहपछि उम्मेदवार विष्टले स्थानीयहरूसँग प्रत्यक्ष साक्षात्कार गर्दै वडामा विद्यमान समस्याहरूका बारेमा छलफल गर्नुभएको थियो । जनताको दैनिकीसँग जोडिएका विषयहरू सडकको अवस्था, ढल व्यवस्थापन, गुणस्तरीय शिक्षा र सहज स्वास्थ्य सेवाका बारेमा छलफल गर्नु भएको थियो । 
स्थानीयको गुनासो र सुझाव ध्यानपूर्वक सुन्दै विष्टले आधारभूत आवश्यकता नै आफ्नो चुनावी अभियानको मुख्य एजेन्डा भएको स्पष्ट पार्नुभयो। “जनताको आवाज नै मेरो नीति हो,” भन्दै उहाँले जनजीवनसँग प्रत्यक्ष जोडिएका समस्या समाधानका लागि संसदमा मजबुत रूपमा आवाज उठाउने प्रतिबद्धता व्यक्त गर्नुभयो।
स्थानीय बासिन्दाहरूले पनि उम्मेदवार विष्टको सरल स्वभाव, सुन्ने शैली र विकासप्रति देखाएको प्रतिबद्धताप्रति आशा व्यक्त गरेका छन्। निर्वाचन सम्पर्क कार्यालय उद्घाटनसँगै वडा १९ मा चुनावी माहोल थप सक्रिय र उत्साहपूर्ण बनेको देखिएको छ। 
