काठमाडौं । नेकपा माओवादी केन्द्रका अध्यक्ष प्रचण्ड र नेकपा माओवादीका महासचिव नेत्र विक्रम चन्द विप्लवबीच छलफल भएको छ ।
शनिबार प्रचण्ड निवासमा भएको भेटमा दुई पार्टीबीच सहकार्यका विषयमा छलफल भएको हो । पार्टी एकताका लागि केही समय लागे पनि सहकार्य भने गर्न सकिने विषयमा छलफल केन्द्रित भएको जनाइएको छ ।
भेटवार्तामा पछिल्लो समसामयिक राजनीतिक विषयदेखि आगामी दिनमा सहकार्य गरेर जानेसम्मको छलफल भएको हो ।
तत्काल पार्टी एकताभन्दा पनि तल्लो तहसम्मै सहकार्य गरेर जाने सहमति भएको प्रचण्डनिकट एक नेताले बताए ।
विप्लवलाई माओवादी केन्द्रका प्रवक्ता कृष्णबहादुर महराको पहलमा खुमलटार लगिएको थियो । पछिल्लो समय माओवादीसँग विप्लवको पार्टी एकता गराउनको लागि प्रवक्ता महरा सक्रिय भएर लागेका छन् । विप्लवलाई माओवादीमा फर्काउन प्रचण्डले महासचिवको जिम्मेवारी दिनसमेत तयार रहेको बुझिएको छ ।
माओवादी विभाजन हुँदा मोहन वैद्य ‘किरण’सँगै रहेका विप्लव २०७१ सालबाट वैद्यबाट पनि अलग भएर आफ्नो नेतृत्वमा पार्टी चलाइरहेका छन् ।
