उदयपुर । उदयपुरका नयाँ प्रमुख जिल्ला अधिकारी धर्मराज जोशीले जिल्लाको शान्ति सुरक्षा सुदृढ बनाउन कुनै कसर बाँकी नराख्ने प्रतिबद्धता जनाउनुभएको छ । बाँकेबाट सरुवा भई उदयपुर पुग्नुभएका प्रजिअ जोशीले बिहीबार पत्रकारहरूसँगको परिचयात्मक कार्यक्रममा पछिल्लो समय कमजोर बन्दै गएको शान्ति सुरक्षालाई मजबुत बनाउने लक्ष्यसहित काम अघि बढाउने बताउनु भयो ।
उहाँले नीति, कानुन र विधिको अधीनमा रही निष्पक्ष रूपमा काम गर्ने प्रतिवद्धता जनाउँदै भने, “कसैको दबाब वा प्रभावमा नपरी, सबैको सहयोगका साथ उदयपुरलाई सुरक्षित र अनुशासित जिल्ला बनाउनेछु।”
शान्ति सुरक्षा र विपद् व्यवस्थापनका विषयमा सूचनाको आदानप्रदानले प्रशासनलाई प्रभावकारी बनाउन सहयोग पुग्ने भन्दै प्रजिअ जोशीले पत्रकारहरूसँग सहकार्य गर्न आग्रह गर्नुभयो ।
लागूऔषधको बढ्दो समस्या र अवैध ढुङ्गा–गिट्टी, बालुवा र काठ तस्करीप्रति चिन्ता व्यक्त गर्दै उहाँले सो गतिविधि रोक्न प्रशासन पूर्ण रूपमा सक्रिय हुने स्पष्ट पार्नुभयो ।
कार्यक्रममा नेपाल पत्रकार महासङ्घ उदयपुर शाखाका अध्यक्ष भक्तिविलास पोखरेल, जिल्लास्थित चार वटै सुरक्षा निकायका प्रमुखहरू तथा सञ्चारकर्मीहरूको उपस्थिति थियो ।
पत्रकारहरूले हालैको जेनजी आन्दोलनपछि कमजोर बनेको शान्ति सुरक्षाप्रति ध्यानाकर्षण गराउँदै अवैध गतिविधि नियन्त्रणमा कडाइ गर्न सुझाव दिएका थिए ।
