काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आठौँ महाधिवेशनमा पेश गरेको राजनीतिक प्रतिवेदन परिमार्जनसहित पारित भएको छ ।
राजनीतिक प्रतिवेदनमा नेताहरुले उठाएको प्रश्न, जिज्ञासाको शुक्रबार जवाफ दिँदै अध्यक्ष प्रचण्डले आएका सुझावहरुलाई समेटिने प्रतिवद्धता व्यक्त गरेका छन् । साथै विचारको विकास गर्नका लागि पार्टीले विशेष महाधिवेशन गर्ने उनले बताए ।
अध्यक्ष प्रचण्डको प्रतिवेदनमा नेताहरुले विभिन्न कोणबाट प्रश्न तथा टिप्पणी गरेपछि जवाफ दिँदै उनले पार्टीले निर्वाचन लगत्तै विशेष महाधिवेशन गर्ने बताए । महाधिवेशनमा आएका सुझावहरु आफ्नो प्रतिवेदनमा समेटिने उनले बताए ।
विचारको विकासका लागि अझै अध्ययन, अनुसन्धान तथा बहसको आवश्यक्ता भएको र यो महाधिवेशनले प्रतिवेदनमार्फत त्यसको सुरुवात गरेको उनले बताए । अहिलेको दस्तावेजलाई पूर्ण दस्तावेजको रुपमा नबुझन आग्रह गर्दै उनले विशेष महाधिवेशनमा विशेष रुपले बहस तथा छलफल हुने आश्वास दिए ।
माओवादी केन्द्रका नेता श्रीराम ढकालले अध्यक्ष प्रचण्डको राजनीति प्रतिवेदन परिमार्जन सहित पारित भएको बताए । अब नेतृत्व चयनका लागि निर्वाचन प्रक्रिया अगाडि बढ्ने उनले बताए ।
