पोखरा । नेकपा एमाले निकट पत्रकारको संगठन प्रेस चौतारी नेपालमा विवादकाबीच नयाँ कमिटी घोषणा गरिएको छ । अध्यक्ष मण्डलले गणेश बस्नेतलाई अध्यक्ष घोषणा गरेको हो ।
पार्टी अध्यक्ष केपी शर्मा ओलीकै रोजाईमा बस्नेत फेरि अध्यक्ष बनेका हुन् । ओलीले उद्घाटन समारोहमै बस्नेतलाई दोहोर्याउने संकेत गरेका थिए । ‘अहिलेको कमिटीले राम्रोसँग काम गर्न पाएको छैन । त्यसका धेरै कारण छन्,’ ओलीले भनेका थिए, ‘यहाँबाट साथीहरुले एकताको सन्देश दिनुहुनेछ । मिलेर कमिटी बनाउनुहोला ।’ उनले बस्नेत रुचाएपछि चौतारीका इन्चार्ज तथा उपमहासचिव पृथ्वीसुब्बा गुरुङले आफ्नै जिल्लाका पाण्डेलाई सहमत गराए । धेरैले गुरुङको समर्थन पाण्डेलाई हुने र पोखरा महाधिवेसनबाट पाण्डे नै अध्यक्ष हुने आँकलन गरेका थिए ।
बस्नेतको अध्यक्ष रहने १५१ सदस्यीय कमिटीमा उपाध्यक्षमा राजेश राई, गणेश पाण्डे, सविन प्रियासन र देविका घर्तीमगर छन् । महासचिवमा हिरामान लामा, उपमहासचिवमा सुरोजंग पाण्डे र राजु सुवेदी, कोषाध्यक्षमा इन्द्र आचार्य रहेका छन् ।
प्रदेशबाट छानिएका सचिवमा विक्रम लुइँटेल, कमल उपाध्याय, विष्णु तारुके, सुष्मा पौडेल, प्रदीप आचार्य, विष्णु शर्मा, लोक्सरी कुँवर र हरिबल्लभ नेपालको नाम आएको छ । अध्यक्ष बस्नेतमात्रै नभए धेरै पदाधिकारीले दोस्रो पटक पनि एउटै पदमा बसेका छन् । उपत्यकालाई सचिव नदिएको भन्दै काठमाडौँ, ललितपुर र भक्तपुरले असहमति जनाएका छन् ।
गए राति नै उम्मेदवारलाई शपथ खुवाउने कार्यक्रम विवाद भएपछि रोकिएको एक प्रतिनिधिले रातोपाटीलाई बताए । २७ र २८ गते सम्पन्न गर्ने भनिएको महाधिवेशन आज पनि लम्बिएको हो । यस महाधिवेशनमा देशभरबाट १ हजार १८ जना प्रतिनिधि सहभागी छन् ।
प्रतिनिधिसमेत निर्वाचनबाटै भए पनि नेतृत्व फेर्ने पक्षमा थिए । तर, मतदाताको मनोभावना विपरित टिका लगाएर नेतृत्व टुङ्ग्याइएको छ । उनीसहित पदाधिकारीको टुंगो लागेको निर्वाचन कमिटीले जनाएको छ ।
