बाँके । राजश्व अनुसन्धान कार्यालय कोहलपुरका एक जना कर्मचारीमाथि छापा मार्ने क्रममा आइतबार दुव्र्यवहार गरेको आरोप प्रहरी नियन्त्रणमा रहेका नेपालगञ्ज उद्योग वाणिज्य संघका प्रवक्ता टंक प्रसाद धामीलाई २४ घण्टा भित्रै रिहा गर्न संघका अध्यक्ष अब्दूल वाहिद मन्सुरी र उप–महासचिव धर्मराज अर्यालले जारी गरेको प्रेस विज्ञप्तिमा उल्लेख गरिएको छ। 
राजश्व अनुसन्धान विभाग कोहलपुरले व्यवसायीहरु संग अनुचित लाभ लिनका लागि छापा मार्ने, रकमको बार्गेनिङ गर्ने जस्तो कार्य गर्दै आएको सोही अनुरूप आइतबार नेपालगन्जको घरबारीटोलमा घटना हुन पुगेकोले उक्त घटनाको निष्पक्ष र स्वतन्त्र छानबिन गर्न संघले प्रेस विज्ञप्ति मार्फत माग गरेको छ ।
व्यापारीहरुको छाता संस्था, नेपालगन्ज उद्योग वाणिज्य संघका अध्यक्ष अब्दूल वाहिद मन्सुरी र उप–महासचिव धर्मराज अर्यालले प्रेस विज्ञप्ति जारी घटनाको स्वतन्त्र छानविन समिति बनाउन सरकारसँग माग गरेको हो । ‘भयरहित व्यापार व्यवसायको अवस्था सिर्जना नगरिए चरणबद्ध आन्दोलन गरिने’ चेतावनी संघले दिएको छ ।
‘राजश्व र व्यवसायी बीचको सम्बन्ध नङ, मासुको हुनुपर्छ’, नेपालगन्ज उद्योग वाणिज्य संघका पूर्व अध्यक्ष कृष्ण प्रसाद श्रेष्ठले राजश्वका कर्मचारीमाथि जाइलाग्नु अनुचित घटना भएको स्वीकार गर्दै भने, ‘के कारणले यो अवस्थाको सिर्जना भयो भन्ने कुरामा राज्य अनविज्ञ रहनु हुँदैन ।’
नेपालगन्ज उद्योग वाणिज्य संघको नेतृत्वमा बुधबार अगुवा उद्योगी, व्यवसायीहरुले प्रमुख जिल्ला अधिकारी सुर्य बहादुर खत्री संग भेटगरी स्वतन्त्र एवं शक्तिशाली समिति गठन गरी घटनाको सम्पूर्ण पक्ष अध्ययन गरेर दोषी जुनसुकै पक्ष भएपनि कानुनी कारवाहीको दायरामा ल्याउनु पर्ने माग गरेका छन् ।
आइतबार राजश्व अनुसन्धान कार्यालय कोहलपुरका कर्मचारी बाबुराम पन्थी सहितको टोली घरबारीटोल पुगी विभिन्न पसलबाट अनुचित लाभ लिइरहेको विषय बाहिर आएपछि धामी त्यहाँ पुगेर कर्मचारीलाई धम्क्याएको भिडियो सार्वजनिक भएको थियो भने कर्मचारीले अनुचित रकम माग गरेको भिडियो हाल सम्म सार्वजनिक हुन सकेको छैन ।
‘अति गरेपछिको प्रतिवाद मात्रै हो’, व्यापारीहरु धामीको पक्षमा उनकै पसल पुगेर पक्राउ न गरिदिन दबाब दिंदै भनिरहेका थिए । संघ सँगको परामर्शमा विवादलाई अन्यथा नलम्ब्याउन धामी प्रहरीमा जानु उचित भएको निष्कर्षपछि उनी प्रहरी नियन्त्रणमा पुगेका हुन् ।
यता प्रेस विज्ञप्तिमा भनिएको छ,कर्मचारी माथि अप्रिय घटना हुन नदिनका लागि जोगाउन खोजेको तर वास्तविकतालाई लुकाउन अपुरो भिडियो भाइरल गरि व्यावसायीलाई सताउन खोजेको आरोप लगाइएको छ ।
