बाँके — डुडुवा गाउँपालिकामा हालै उत्पन्न विवाद र आन्दोलनलाई लिएर विभिन्न पक्षका प्रेस विज्ञप्ति सार्वजनिक भएपछि स्थानीय राजनीति झन् तातेको छ । एकातिर प्रदेश सभा सदस्य भण्डारी लाल आहिरले गाउँपालिका अध्यक्ष नरेन्द्र चौधरी माथि अनियमितता र भ्रष्टाचार ढाकछोप गर्न आन्दोलन भडकाएको आरोप लगाएका छन् भने अर्कोतर्फ समाजवादी युवा संघ र अन्य स्थानीय नेताहरुले सो आरोपलाई अस्वीकृत गर्दै निष्पक्ष छानबिनको माग गरेका छन् ।
प्रदेश सांसद आहिरले असोज ३ गते गाउँपालिकाले जारी गरेको विज्ञप्तिमा आफू नेतृत्वमा कार्यालय तोडफोड गरिएको भन्ने दाबीलाई असत्य र भ्रामक भनेका छन् । विज्ञप्तिमा उनले गाउँपालिका अध्यक्षकै निर्देशनमा आफ्ना नजिकका व्यक्तिहरू प्रयोग गरी आन्दोलन भड्काइएको र यसरी गरिएको कार्यले जनतामाझ भ्रम फैलाउने प्रयास भएको उल्लेख गरेका छन् । आहिरले डुडुवामा भएको भ्रष्टाचार र अनियमितता नै आन्दोलनको कारण भएको दाबी गर्दै दोषीलाई कानूनी दायरामा ल्याउन सम्बन्धित निकायलाई आग्रह गरेका छन् ।
यसैगरी समाजवादी युवा संघ डुडुवा गाउँपालिकाले आहिर लगायत माथि लगाएको आरोपलाई राजनीतिक प्रतिशोध भन्दै खारेज गरेको छ । संघका अध्यक्ष रियाजुद्दिन खानले गाउँपालिकामा भएको घटनामा आफुहरुको संलग्नता नरहेको स्पष्ट पार्दै, यस्तो आरोप लगाउनु मात्रै बदनाम गर्ने प्रयास भएको बताए । संघले गाउँपालिकामा लगातार बढ्दै गएको भ्रष्टाचार, अनियमितता र दुरुपयोग नै समस्या भएको उल्लेख गर्दै छानबिनमार्फत दोषीलाई कारबाही गर्न माग गरेको छ ।
त्यस्तै, पूर्व प्रदेश मन्त्री विजय बहादुर यादवले पनि विज्ञप्ति जारी गर्दै घटनाबारे स्वतन्त्र र निष्पक्ष छानबिन गर्न जोड दिएका छन् । उनले लेखा शाखाबाट हराएको कागजात, आन्दोलनका क्रममा भएको आगजनी प्रयास र तोडफोडलाई गम्भीर विषयका रूपमा लिँदै सेनादेखि प्रहरीसम्म सबैलाई पारदर्शी अनुसन्धानमा संलग्न गराउन माग गरेका छन् । यादवले भविष्यमा यस्ता घटना नदोहोरिन सुरक्षा संयन्त्रलाई थप सुदृढ बनाउनुपर्नेमा पनि जोड दिएका छन् ।
डुडुवा गाउँपालिकाको विवाद अहिले आरोप–प्रत्यारोपको खेलमा सीमित देखिए पनि यसको मूल जड भनेको स्थानीय तहमा भएको भ्रष्टाचार, अनियमितता र पारदर्शिताको अभाव नै रहेको स्थानीय सरोकारवालाहरु बताउँछन् । सांसद आहिरको बिज्ञप्ति, समाजवादी युवा संघको खण्डन र पूर्व मन्त्री यादवको निष्पक्ष छानबिनको मागबीच अब ध्यान घटनाको सत्यतर्फ मोडिनु जरुरी देखिएको छ । 
