काठमाडौं । संसदमा त्रिभुवन अन्तर्राष्ट्रिय विमानस्थलमा भारतीय सुरक्षाकर्मी हटाउन माग गरिएको छ । आइतबार बसेको प्रतिनिधिसभा बैठकमा सांसद एकनाथ ढकालले विमानस्थलबाट भारतीय सुरक्षाकर्मी हटाउन माग गरे । प्रतिनिधिसभा बैठकको शून्य समयमा बोल्दै उनले त्रिभुवन विमानस्थलबाट भारतीय सुरक्षाकर्मी हटाउन प्रधानमन्त्रीसँग माग गरेका हुन् ।
आफैँले भोगको घटनाको स्मरण गर्दै उनले भने, ‘केही हप्ताअघि भारतको अयोध्यामा आयोजित एक कार्यक्रममा भाग लिन जाने क्रममा त्रिभुवन विमानस्थलमा नेपाली सुरक्षाकर्मीको सबै सुरक्षा पास गरेर एयर इन्डियामा चढ्नुअघि भारतीय सुरक्षाकर्मीबाट शरीरको खानतलासी गर्ने काम भयो । त्यो सर्वसाधारणका लागिमात्र होइन, नेपाली कूटनीतिकको लागि पनि भयो । एउटा सार्वभौमसम्पन्न राष्ट्रका लागि यो कति शोभायमान विषय हो ?’
