काठमाडौं । डाक्टरमाथि भइरहेको आक्रमण विरुद्ध स्वास्थ्यकर्मीहरुले आन्दोलन थालेका छन् । उनीहरूले सुरक्षाको माग गर्दै माइतीघर मण्डलामा प्रदर्शन गरिरहेका छन् ।
हिजो (सोमबार) पोखराको मणिपाल शिक्षण अस्पताल र लमजुङ जिल्ला अस्पतालमा कार्यरत ठाक्टरमाथि कुटपिट भएको थियो । यसरी पटक पटक चिकित्सकमाथि भएको आक्रमणले सेवा प्रवाह गर्ने वातावरण नभएको भन्दै स्वास्थ्यकर्मी आन्दोलनमा उत्रिएका हुन् ।
यसअघि गएको २७ गते हेटौँडा उपमहानगरपालिका वडा नम्बर-१ मा रहेको सञ्चो अस्पतालमा कार्यरत डाक्टर विकास थापा र डक्टर प्रशान्त बिडारीमाथि कुटपिट भएको थियो । यसको विरोधमा नेपाल चिकित्सक सङ्घले ३१ गते देशभर सरकारी अस्पतालको आकस्मिक सेवा बन्द गरेर विरोध गरेको थियो ।
दोषीलाई कारबाही गर्ने सहमतिपछि सङ्घले आन्दोलन फिर्ता गरेको थियो । तर, हिजो फेरि डाक्टरमाथि कुटपिट भएपछि डाक्टर तथा स्वास्थ्यकर्मी कार्यस्थलमा सुरक्षाको प्रत्याभूति हुनुपर्ने, स्वास्थ्यकर्मी तथा स्वास्थ्य संस्थाको सुरक्षासम्बन्धी संशोधन ऐन कार्यान्वयन गर्नुपर्ने माग राखेर आन्दोलनमा निस्किएका हुन् ।
उनीहरुले स्वास्थ्यमन्त्री र गृहमन्त्रीको राजीनामा समेत मागेका छन् । यसअघि विद्यालय शिक्षा विधेयकको विरोध गर्दै देशभरका शिक्षकहरु आन्दोलनमा उत्रिएका थिए । नेपाल शिक्षक संघले असोज ५ गते सरकारसँग सहमती गरेपछि आन्दोलन स्थगन गरेको थियो ।
