बाँके । वडा प्रहरी कार्यालय नेपालगञ्जका प्रमुख प्रहरी निरीक्षक इन्द्रजित सुनारले सबै पक्षको साथ र सहयोगमा प्रहरीले अपराध नियन्त्रण गर्ने बताउनु भएको छ ।
वडा प्रहरी कार्यालयको इन्चार्जको रुपमा केही दिनअघि सरुवा भई आउनुभएका प्रहरी निरीक्षक सुनारले नेपालगञ्जलाई ब्यवस्थित र शान्ति सुरक्षामा ढुक्क रहनेगरि काम गर्ने प्रतिवद्धता ब्यक्त गर्नुभयो ।
बुधबार आयोजित पत्रकार परिचयात्मक तथा अन्तरक्रिया कार्यक्रममा प्रहरी निरीक्षक सुनारले नेपालगञ्जका प्रमुख सुरक्षा सवाल लगायतका विषयमा छलफल गर्नुभएको थियो । उहाँले आफु यसअघि लामो समयदेखि नेपालगञ्जमा बसेका कारण नेपालगञ्जको अवस्थाबारे पूर्ण जानकार रहेको भन्दै सबै पक्षको साथ र सहयोगको अपेक्षा गरिएको बताउनुभयो ।ट्राफिक महाशाखा काठमाडौंबाट सरुवा भएका कारण प्रहरी निरीक्षक सुनारको नेपालगञ्जको अस्तब्यस्त ट्राफिक ब्यवस्थापनका लागि ट्राफिक प्रहरी र नेपालगञ्ज उपमहानगरपालिकाको नगर प्रहरीसँग समन्वय गरेर अघि बढ्न पत्रकारहरुले सुझाव दिएका थिए साथै सो अवसरमा प्रहरी निरिक्षक सुनारलाई लागु औषध तथा खुला सीमाका कारण हुने चोरी, तस्करी नियन्त्रण, ट्राफिक ब्यवस्थापन लगायतका विषयमा विशेष ध्यान दिन सुझाव दिइएको थियो ।
उहाँले प्रहरी एक्लैको प्रयासमा मात्रै समाजमा शान्ति स्थापना हुन नसक्ने भएकाले सबै पक्षको साथ र सहयोगको अपेक्षा गरिएको बताउनुभयो । पश्चिम रुकुमको चौरजहारी जन्मथलो भएका प्रहरी निरीक्षक सुनारले उच्च शिक्षा नेपालगञ्जबाटै प्राप्त गर्नुका साथै कानुनका विधार्थी हुन् ।
