बाजुरा । अदम्य सेवा भावना र व्यावसायिक दायित्वको उदाहरण प्रस्तुत गर्दै बाजुराको बुढीगङ्गा नगरपालिका–७ स्थित झाली बर्थिङ सेन्टरकी स्वास्थ्यकर्मी बिनिता विष्टले बाटोमै सुत्केरी सेवा दिँदै आमा र शिशुको ज्यान बचाएकी छन्।
शुक्रबार बिहान बुढीगङ्गा–७ सिमलकोटकी अन्दाजी २५ वर्षीया सिर्जना केसीलाई अचानक प्रसव पीडा सुरु भएपछि स्वास्थ्यकर्मी विष्टले तत्कालै घटना स्थलमै पुगेर सहयोग गरेकी थिइन्। बर्थिङ सेन्टर पुग्न नसक्ने अवस्था भएपछि उनले बीच बाटोमै सुरक्षित रूपमा बच्चा जन्माउन सहयोग गरेकी हुन्।
सकुशल जन्मिएको शिशुको तौल तीन केजी रहेको र आमा–बच्चा दुवैको स्वास्थ्य सामान्य रहेको स्वास्थ्यकर्मी विष्टले जानकारी दिइन्। सिर्जना केसीका श्रीमान् राजेश केसीले विष्टको समयमै उपस्थिती र निःस्वार्थ सेवाको प्रशंसा गर्दै “उहाँको कारण आज मेरी श्रीमती र बच्चा सुरक्षित छन्,” भने।
स्थानीयवासीहरूले विष्टको यो कार्यलाई “मानवता र सेवाको प्रतिमूर्तरूप” भन्दै प्रशंसा गरेका छन्।
