बाँके । बाँकेका ८ वटै स्थानीय तहमा मतगणना चलिरहेको छ । अहिलेसम्म नेपाली कांग्रेसले नेपालगन्जसहित ६ स्थानीय तहमा अग्रता लिइरहेको छ । यस्तै नेकपा एमालेले २ वटा स्थानीय तहमा अग्रता कायम गरेको छ ।
मुख्य निर्वाचन अधिकृतको कार्यालयका अनुसार नेपालगन्ज उपमहानगरपालिकाको प्रमुख पदमा नेपाली कांग्रेसका प्रशान्त विष्टले अग्रता लिएका छन् । उपप्रमुखमा जनता समाजवादी पार्टी(जसपा)का कमरुद्धिन राईले अग्रता लिइरहेका छन् ।
कोहलपुर नगरपालिकामा नगर प्रमुख पदमा नेपाली कांग्रेसका पूर्णप्रसाद आचार्य र उपप्रमुख पदमा कांग्रेसकै संगिता सुवेदीले अग्रता लिएकी छन् । यसैगरी डुडुवा गाउँपालिका अध्यक्षमा नेपाली कांग्रेसका नरेन्द्र कुमार चौधरी र उपाध्यक्षमा कांग्रेसकै साहिदा बानोले अग्रता लिएकी छन् । जानकी गाउँपालिका अध्यक्ष पदमा कांग्रेसका छब्बन खाँ र रामप्यारी यादवले अग्रता लिएका छन् ।
त्यस्तै बैजनाथ गाउँपालिकाको अध्यक्षमा प्रकाशबहादुर शाही र उपाध्यक्षमा निर्मला रोकायले अग्रता लिएका छन् । नरैनापुर गाउँपालिकाको अध्यक्षमा नेपाली कांग्रेसका रामचन्द्र मौर्य र उपाध्यक्षमा अतिकुन निसाले अग्रता लिइरहेका बेला शनिबार राती मतगणना स्थगित भएको थियो । अहिलेसम्म मतगणना सुरु भएको छैन ।
राप्ती सोनारी गाउँपालिका अध्यक्षमा नेकपा एमालेका रामदास थारु र उपाध्यक्षमा एमालेकै चमेली बागबलले अग्रता लिएका छन् । खजुरा गाउँपालिकाको अध्यक्षमा एमालेका सुमन मल्ल र उपाध्यक्षमा ताजरुन निसाले अग्रता लिएका छन् ।
