बाँके । बाँकेको जानकी गाउँपालिकामा झाडापखाला र बान्ताका कारण एकजनाको मृत्यु भएको छ । जानकी गाउँपालिका–५ बेलहरीका ३४ वर्षीय होली तेलीको मृत्यु भएको स्वास्थ्य कार्यालयका सूचना अधिकारी नरेश श्रेष्ठले जानकारी दिनु भयो । 
श्रेष्ठले भन्नुभयो, “परीक्षणमा हैजाको जीवाणु देखिएको छैन, खानेपानी प्रशस्त नखाएको र समयमा उपचार नभएकाले मृत्यु भएको हुनसक्छ ।”, जानकी गाउँपालिकामा तीनजनामा झाडा पखाला र बान्ताका बिरामी भेटिएका छन् ।
तीमध्ये एकजनाको भेरी अस्पताल र अर्का एकजनाको स्थानीय स्वास्थ्यचौकीमा उपचार भइरहेको छ । एकजना भने उपचारपछि घर फर्केका छन् । यसअघि जिल्लाको नरैनापुरमा विभिन्न समयमा झाडा पखाला र बान्ताका कारण पाँचजनाको मृत्यु भएको अधिकारी श्रेष्ठले बताउनु भयाे । झाडापखालाको बिरामी बढे पछि नरैनापुरले स्थानीय स्तरमा नै आपत्कालीन उपचार कक्ष स्थापना गरि उपचार सुरु गरेको छ । 
