बाँके । जेनजी आन्दोलनका क्रममा भएको गम्भीर सुरक्षा चुकपछि जिल्ला प्रहरी कार्यालय बाँकेका प्रहरी उपरिक्षक राम प्रसाद घर्तिमगरलाई हटाएर अपराध अनुसन्धान महाशाखामा कार्यरत अंगुर जिसीलाई जिम्मेवारी दिएर पठाएको छैठौ दिन पत्रकार सम्मेलन गरी बाँकेको सुरक्षा अवस्थाका बारेमा जानकारी गराउनु भएको छ ।
प्रहरी उपरिक्षक जिसीले नेपाल प्रहरीले स्थापना कालदेखि देशमा भएका विभिन्न द्वन्द्व, उतार चढाव, राजनीतिक परिवर्तन र संक्रमणकालहरूमा अविचलित रहँदै देश र जनताको स्वार्थ र आकांक्षालाई केन्द्रबिन्दुमा राखेर आफ्नो कर्तव्य प्रभावकारी रूपमा निर्वाह गर्दै आइरहेको बताउदै उहाँले नेपाली समाजको नवीनतम् र चेतनशील पुस्ता जेन–जी ले गरेको ऐतिहासिक आन्दोलनलाई नेपाल प्रहरीले सम्मान गर्ने र यसका उपलब्धीहरूको संरक्षणका लागि रचनात्मक योगदान पु¥याउन पछि नहटने प्रतिबद्धता व्यक्त गर्नु भयो ।
बाँके प्रहरीको दुई वटा गाडी, केही मोटर साईकल, ट्राफिक प्रहरी कार्यालय सहित २ वटा प्रहरी पोष्ट र प्रहरी विटमा आन्दोलनका क्रममा आगजनी भएको जानकारी गराउदै प्रहरी उपरिक्षक जिसीले अत्यन्त सीमित स्रोत साधनहरूको उपलब्धताका बीच नेपाल प्रहरीले आन्दोलनलाई सापेक्षित रूपमा अत्यन्त संवेदनशील र संयमित भएर लिएको जिकिर गर्नु भयो ।
आन्तरिक सुरक्षामा नेपाल प्रहरीको प्रमुख दायित्व नै जनधनको सुरक्षा गर्नु रहेको बताउदै उहाँले कानुन कार्यान्वयन र शान्ति सुव्यवस्था कायम गर्ने निकायको रूपमा नेपाल प्रहरी सदैव अग्रपत्तिंमा रहेर काम गर्ने बताउनु भयो ।
प्रहरी उपरिक्षक जिसीले हालको स्थिति र आगामी दिनहरूमा समेत उत्पन्न हुने सुरक्षा चुनौतीहरू एवम् असहज परिस्थितिहरूको सामना गर्दै आम नागरिकहरूलाई शान्ति सुरक्षा तथा अमनचयनको प्रत्याभूति दिलाउँदै नागरिक भरोसाको केन्द्रबिन्दुमा रहन नेपाल प्रहरी व्यावसायिक रूपमा सक्षम तथा प्रतिवद्ध रहेको बताउनुभयो । नेपालको संविधान, प्रचलित ऐन कानुन तथा मानव अधिकारका अन्तर्राष्ट्रिय मापदण्ड समेतले निर्दिष्ट गरेको काम कर्तव्य र दायित्व प्रति नेपाल प्रहरी पूर्णत निष्ठावान रहि आफ्नो जिम्मेवारी बहन गर्दै आएको बताउँदै नेपालको फौजदारी कानुनी प्रणालीमा आधारित रहि अपराध अनुसन्धानलाई परिणाममूखी र वैज्ञानिक बनाई न्यायिक प्रकृयामा निष्पक्ष र पूर्ण व्यावसायिक रहि कार्यसम्पादन गर्न मतहतका प्रहरी कर्मचारीहरुलाई निर्देशन दिनु भयो ।
युवा पुस्ताले चाहना गरेको परिवर्तनको लहरमा आफ्नो स्वार्थ सिद्ध गर्न, राज्यको ऐतिहासिक धरोहरहरू, महत्वपूर्ण प्रतिष्ठानहरू, निजि तथा सार्वजनिक सम्पत्तिहरू, व्यापारीक प्रतिष्ठानहरू लगायतमा पु¥याइएको क्षतिमा संलग्नहरूको पहिचान एवम् अनुसन्धान गरी कानुन बमोजिम कारवाहीको दायरामा ल्याई आम नागरिकको मनमा कानूनी राज्य र कानूनको शासनको प्रत्याभूति दिलाउन बाँके प्रहरी प्रतिबद्ध रहेको बताउदै २३ र गते भएको घटनाको अनुसन्धान गर्न उच्च स्तरीय आयोग गठन भएकोले उक्त आयोगको अनुसन्धान पश्चात सिफारीश बमोजिम कारवाही सुरु गर्ने बताउनु भयो । बाँकेमा हुने अपराधलाई नियन्त्रण गर्न १२ सय प्रहरी परिचालन गरेको बताउदै प्रहरी नायब उपरिक्षक दिपक पातलीले चाड पर्वका बेला आवश्यक परे थप प्रहरी परिचालन गर्ने तयारी गरिएको जानकारी गराउनु भएको थियो ।
