बाँके । बाँकेको राप्ती सोनारी गाँउपालिका – ७ ले आयोजना गरेको पूर्वी वडा स्तरीय फुटबल र क्रिकेट प्रतियोगिताको बुधबार सम्पन्न भएको छ ।
प्रतियोगितामा फुटबाल तर्फ न्यु जन परोपकारी युवा क्लबले उपाधि जितेको थियो भने मुस्कान युवा क्लबले उपबिजेताको उपाधि प्राप्त गरेको वडाले जनाएको छ ।
शनिबार निबुवातारमा रहेको शहिद दल बहादुर घर्ति खेल मैदानमा भएको फाइनल प्रतिस्पर्धामा मुस्कान युवा क्लब लाई १–४ गोल अन्तरले पराजित गर्दै न्यु जन परोपकारी युवा क्लबलले उपाधि जितेको हो । प्रतियोगिताको विजेता न्यु जन परोपकारी युवा क्लबलाई १५ हजार नगद पुरस्कार सहित शिल्ड, मेडल र प्रमाणपत्र, उपविजेता मुस्कान युवा क्लबलाई ८ हजार नगद पुरस्कार सहित शिल्ड, मेडल र प्रमाणपत्र प्रदान गरिएको छ । फुटबाल खेलमा ६ वटा समूहले सहभागिता जनाएका थिए ।
टोल विकास समितिका अध्यक्ष कालुराम थारुको अध्यक्षतामा भएको समापन कार्यक्रममा वडा नं. ७ का अध्यक्ष राम लखन थारुले पुरस्कार र शिल्ड हस्तान्तरण गर्नु भएको थियो । कार्यक्रममा वडा सदस्यहरु जित बहादुर थारु, मिना बुढा, इलाही गद्दी, जगराना रैदास लगायत स्थानीय राजनितिकदल प्रतिनिधिहरुको सहभागिता रहेको थियो । वडाको आयोजनामा वडा स्तरीय प्रतियोगिताअन्तर्गत विभिन्न विधामा खेल हुदै आएको छ ।
