नरैनापुर । मुस्लिम धर्मगुरु सुफि शैयद मुस्ताक अहमद शाहको आज शनिवार अन्त्येष्टि गर्न लागिएको छ । आज बिहान १० बजे उहाँको अन्तिम संस्कार इस्लामिक परम्पराका आधारमा आस्तान ए हजरत खलीफा नूर अहमद शाहको मजार शरीफमा सुरु गरिने छ ।
अन्त्येष्टि समारोहमा करिब दश हजार व्यक्तिको उपस्थिति हुने अपेक्षा गरिएको छ । तीमध्ये करिब एक हजार जना भारतका व्यक्तिहरुको सहभागिता रहने नरैनापुर गाउँपालिकाका अध्यक्ष इस्तियाक अहमद शाहले जानकारी दिनु भयो ।
भारतीय पहुना र स्थानीय बासिन्दासहित हजारौंले भारतको दिल्लीबाट शव शुक्रबार राति नरैनापुर पुगे पछि उहाँको शवमा श्रद्धाञ्जली दिएका थिए । श्रद्धाञ्जली दिनका लागि शव राखिएको ठाउँमा ठूलो सङ्ख्यामा लामबद्ध भएकाहरूको भीड लागेको थियो ।
नरैनापुर गाउँपालिकाका अध्यक्ष शैयद इस्तियाक अहमद शाहको ठुलो दाजुको मृत्युले नरैनापुर पुरै शोकमा डुबेको छ । अध्यक्ष शाहले भन्नुभयो, घर देखि मजार शरिफ सम्म शव यात्रा गर्दै लगिने तय भएको छ । शवयात्रामा प्रतिनिधि सभाका सदस्यहरू, संबिधान सभाका सदस्य, प्रदेश सभा सदस्य, प्रमुख जिल्ला अधिकारी, सुरक्षा निकायका प्रमुखहरु, जनप्रतिनिधिहरु, पत्रकार , अधिकारकर्मी, कर्मचारीहरु लगायत बाँके बर्दियाका व्यक्तिहरुको सहभागिता रहने छ । धर्म गुरु एंव सुफि शैयद मुस्ताक अहमद शाहको उपचारको क्रममा भारतको दिल्लीमा रहेको मेक्स अस्पतालमा बिहिबार राति मृत्यु भएको डाक्टरहरुले पुष्टि गरेका थिए । ७८ बर्षिया शाह मुस्लिम धर्म गुरु मात्र नभइ सबै समुदायको साझा व्यक्तित्व हुनु हुन्थ्यो ।
