विराटनगर । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले निर्वाचनपछि आफूहरुको सरकार बनेसँगै अवसर नै अवसर दिने आश्वासन बताएका छन् ।
शनिबार सत्ता गठबन्धनले विराटनगरमा आयोजना गरेको संयुक्त भेलालाई सम्बोधन गर्दै अध्यक्ष प्रचण्डले नेता–कार्यकर्तालाई यस्तो आश्वासन दिएका हुन् ।
पूर्वप्रधानमन्त्रीसमेत रहेका अध्यक्ष प्रचण्डले भने, ‘हाम्रो सरकार बनिसकेपछि अवसर नै अवसर हुनेछ । काम खोजेर हिँड्नै पर्दैन ।’ प्रचण्डले पार्टीभित्र अन्याय भएकोजस्तो लागेकाहरुलाई पनि निर्वाचनपछि सम्बोधन हुने बताए । प्रचण्डले भने, ‘जो साथीहरुलाई अलिकति अन्याय भएकोजस्तो लागेको छ, तीनलाई सम्बोधन गरिनेछ ।’
आगामी ४ मंसिरको चुनाव सामान्य नभएको र एउटा आन्दोलन नै भएको बताउँदै प्रचण्डले भने, ‘यो निर्वाचन अभियान भनेको एउटा आन्दोलन पनि हो, अभियान पनि हो । यो अभियानलाई गहिरोसँग लिइदिनुहोला ।’
प्रचण्डले अहिले पनि आफूहरुविरुद्ध षडयन्त्र नरोकिएको समेत बताए । उनले भने, ‘गठबन्धनका सबै साथीहरुलाई गहिरो कुरा छ, अहिलेपनि षडयन्त्र रोकिएको छैन् । हामी विजयीको यात्रातिर छौं ।’ उनले यही निर्वाचनमार्फत लोकतन्त्र र परिवर्तनका विरोधी, प्रतिगामी शक्तिहरुलाई परास्तर हुने बताए ।
